Выступленне Прэзідэнта Рэспублікі Беларусь А.Р.Лукашэнкі на ўрачыстым пасяджэнні, прысвечаным Дню Незалежнасці Рэспублікі Беларусь

Паважаныя суайчыннікі!

Мы з’яўляемся сведкамі станаўлення і стваральнікамі новай беларускай дзяржавы. Новай перш за ўсё ў адносінах да грамадзян і грамадства. Дзяржавы, у якой безумоўна пануе аўтарытэт і сіла Закона.

Адбыўся, без перабольшвання, гіганцкі паварот. Змянілася сама прырода беларускай улады, дзяржаўнасці. Улада набыла новую, дэмакратычную аснову.

Народам адкарэкціравана Канстытуцыя краіны, у якой збалансавана ўзаемадзеянне ўсіх галін ўлады. Сфарміравана сучасная палітычная сістэма. Выбраны і паспяхова працуе двухпалатны Парламент. Забяспечаны грамадзянскія свабоды, функцыяніруюць самыя розныя па форме ўласнасці сродкі масавай інфармацыі. Расце колькасць грамадскіх арганізацый.

Рэфарміруецца вертыкаль улады. Адміністрацыйны апарат прыкметна скарочаны па колькасці, але вырас прафесійна.

Рэспубліка Беларусь мае сучасныя Узброеныя Сілы. У цяперашні час праводзіцца іх мадэрнізацыя. Ствараецца мабільная, кампактная армія. Высокая ступень яе боегатоўнасці была наглядна і пераканаўча прадэманстравана ў ходзе нядаўняга комплекснага аператыўна-тактычнага вучэння “Бярэзіна( 2002″.

Абвяргаючы прагнозы песімістаў і нядобразычліўцаў, мы дастаткова эфектыўна асвоілі асновы дэмакратыі і рыначнай эканомікі. Навучыліся самі, без падказак, будаваць сваё жыццё. Краіна ўвайшла ў фазу эканамічнага росту, адной з першых пераадолела крызіс і пераўзышла ўзровень вытворчасці 1990 года.

Упершыню ў навейшай гісторыі Беларусі з’явіліся цвёрдыя падставы для размовы аб стабільным, прадказальным жыцці не як аб мэце або перспектыве, а як аб здзейсненым факце, часе спраўджаных надзей.

Мы даказалі свету, што ў любых умовах беларусы не проста гатовы да перамен, але і здольны іх самастойна ажыццяўляць.