Выступленне Прэзідэнта Рэспублікі Беларусь А.Р.Лукашэнкі на ўрачыстым пасяджэнні, прысвечаным Дню Незалежнасці Рэспублікі Беларусь

Дарагія сябры!

Беларуская дзяржаўнасць мае надзейны падмурак. Яна бярэ свае вытокі ад старажытнай Полацкай зямлі, Вялікага княства Літоўскага, герояў Грунвальдскай бітвы.

Ідэі беларускай дзяржаўнасці непарыўна звязаны з ідэямі славянскага адзінства, братэрства і супрацоўніцтва народаў. Яны выяўляліся ў падзвіжніцкай дзейнасці многіх славутых сыноў Беларусі. Знайшлі яскравае адлюстроўванне ў творчасці нашых народных песняроў Якуба Коласа і Янкі Купалы, чыё 120-годдзе з дня нараджэння мы сёлета ўрачыста адзначаем.

Абвешчаная 1 студзеня 1919 года Беларуская Савецкая Сацыялістычная Рэспубліка стала першай рэальнай нацыянальнай беларускай дзяржавай.

Нашы папярэднікі зрабілі вельмі шмат для нашай Бацькаўшчыны. Упершыню ў гісторыі былі створаны рэальна дзеючыя апарат дзяржаўнай улады, нацыянальная сістэма адукацыі і культуры, назапашаны вялікі эканамічны патэнцыял.

Важкі ўклад у дзяржаўнае, гаспадарчае і культурнае будаўніцтва беларускай дзяржавы ўнеслі Аляксандр Чарвякоў, Зміцер Жылуновіч, у пасляваенны час - Кірыла Мазураў, Пётр Машэраў, Ціхан Кісялёў.

Суровым экзаменам на мужнасць і трываласць нашага народа стала Вялікая Айчынная вайна. Усе 1418 вогненных дзён і начэй, ад першага стрэлу той вайны ля сценаў Брэсцкай крэпасці, наша рэспубліка-партызанка аказвала небывалае ў гісторыі чалавецтва супраціўленне агрэсару.